MIN HRUAI HAW RAWH

                                                                                                    -Hriata Tea

Thil hre tak tak leh huai tak tak ten anlo sawibuai loh nan, hmun hming leh thup theih zawng zawng thup ila, minti mualpho ti a min chhuahchhal tu ka tawn loh bawk nan. A tak leh lemah lo buai duh suh.

March thlatir lam ani a, khua pawh ala vawt angreng viau na a. Mi kal hma leh ankal tam tak tak hma chuh in, khua atanga km30 zet a hla, mizorama luilian ber pawl, fintu kurung lui chu, luipui afinna atanga zan lènden tum in ka inkhalh chhuak a, luipui a finna hi motor kawngpui bul mai anih avangin, hla deuh mahse kal chik berah ka nei thin.

Tlai darthum pelh hret hnuah ka thlenga, luipui chu panthla in, kurung luiin, luipui arawn finna. Kurung lui chhuah ah chuan innghat in, tlai chawhmeh tur sangha man tumin, luipui (a hming ka sawi duhlo) zawk chu, suar panlai ah nghate man tumin ka lèn chu ka deng(vawrh) lauh2 a, ka hmeh khawp zawng kar lo ah ka man thuai mai. Ka innghahna hmunah chuan, letin ka sangha man chu, maubur in ka chhum a, khua pawh athim lek lek tawh a, kawr ruam laiah phei chu athim deuh mup tawh a ni. Ka chawfun phawrh in, sangha chhum nen chuan, ka in eipuar a, ka inpeih fel meuh chuan, khua pawh alo thim fel tawh a. Ka meichhem chu ka vur belh vak a, âm tak leh thlantla hluam khawpa ka âi luih hnuah, kurung lui lam chu ka pansan ta a ni.

Phûr takin ka lên chu ka vawrh sauh sauh a, sangha pawh ka khuh tha thei phian mai. Nuam ka tihna chuan, vawt pawh minti hre chang hlei lo a. Ka hriatloh kar in, a lui hmingput chhan ber kùrung pawh kalo thleng chho der mai. He kurung hi țhâl lai pawn patling ban pil zak hi ani reng hrim hrim a. Hêl loh theih loh in, a bang asang a. Hleuh chho ngawt mah ila, a lawn kai theih tlat loh a ni. A helna lah lungbang pangper a lawn ngai tho ani a, tlak hlauhawm tak ani bawk. Zanah aiin chhun èng ah a hlauhawm zawk mah leh nghal. A chhan chu, chhun engah chuan, a hlauhawm zia engkim alan fiah vang a ni.

Fimkhur takin ka lawn a, a hlauhawm lai ber ka thleng țep tih chuan, kurung li thûk lai zawn tak ah chuan, e nge mawni tehreng ni, atla ri burh mai a. Naupang mangang țawng niawm tak ka hre zui leh nghal a, ka light chuan kan èn kual a, engmah ka hmu lem hlei lo a. Sahram ni hmiang kati rilru mai a. Muangchang leh fimkhur zet chuan, ka hel chhuak ta hram a.

Kawi hnih vel ka déng leh tawh, sangha pawh ka rinai tam mah kaMan tawh ang tih chuan, ka chhak lì chu dèn tumin ka pan chho a. Mahse ka kalna tur tak lungpher chunga ka thil hmuh chuan, minti ding chiang kher mai. Rangtakin lui hnar lam leh vaukam te chu ka chhun èng kual pup pup a. Engmah ka hmu lem hleilo a. Mahse ka hma zawna naupang ke thla(hniak) huh hlap mai chu a chiang em em bawk si. Ka zui chho zel a, len den nachang pawh ka hre tawh lo. Tui dai ngai chin ka thlen chuan, a hniak pawh atawp ve mai a.

Pa huaisen tak kani lemlo bawk a, khur ru deuh der der chung chuan, ka lét thlaksan ta ani. Kan hnung chhawn chiah chu, ka mawngtam ațanga tukhum thleng mai chuan, ka mùr chuai chuaih mai a. Torchlight èng ringawt mah nise, chhun en lai ang tho a chakin ka kal thla pur pur mai a ni. Kurung lì lian kan hel te chu, ka chhoh lam aiin ka awlsam zawk daih. Kurung kan pel thla chu ka thlamuang huaai mai. Lì tha lai deuh deuh te chu ka chhuk den pah thla leh ta zel a, sangha pawh kg4 vel zet tur ka man tawh a. Maubur nen chuan, ka rit angreng viau tawh a ni. Thla te amuang deuh ta bawk a, ka hmu sual mai anih te ka ring deuh hnuhnawh a. Duh leh luipuiah ka deng leh anga nimai ti rilru chung chuan, ka chhuk zel a.

Luipui ka thleng thla țep tawh, chhun eng ni pheise luipui pawh alang phak tawh hial ang. Ka hma lungpui kan perkai chu, naupang hniak thar zet mai, a ke hnu tuiluanna pawh la luang ngiai ngiai thei hi ka hmu leh ta mai a. Mahse a hma ang em chuan ka hlau tawh lo. Kawngpui ka hnaih tawh tlat. Ngaihțhalo leh hlau ru deuh chung chuan, ke hniak chu ka zui thla zel a, luipui pawh thla liam turin a la kap/chhun var ruau ruau chu ka hmu thei tawh a, ka innghahna lam ka panphei chu ka ding chawt mai. Ka meichhemna bulah chuan, mihring țhu kava hmu dum ruau ruau thei tlat ani. Hreh zetin, ka light chuan kan chhun a, naupag kum 12 mi vel tur hi a khup a, alu nghatin alo țhu kun lup mai a. Ka panphei zel a, a khur deuh beuh beuh tih pawh ka hmu thei a ni.

A bul ka thlen chuan, vala enge itih a, tun an hunah te, tu nen nge in nih kan ti a. Min chhang miahlo. A ke chu a kuah tawm a, kun lup chung chuan a khur beuh beuh mai, ka mei chu kan chhem alh a. A vawt iti ani maw, rawn ai hnai rawh. khawi khua nge inih kan ti leh (he lui atanga km8 velah hian khawte in 30 vel lek awmna a awm ve vanga zawt ka ni a.) a thawmhnaw te chu a huh vek a, a rawn hawichhuak a, a hmel te chu vawt tih vang ni ngei tur ani a dâng var pap mai, a hmui khur hlawk hlawk chu a duk chur mai bawk a, a mitmeng dul raih chuan, min han melh a, ka pu min hruai haw rawh, apa in min kalsan a, a rawn ti a. Ka khawngaih kher mai. Ka kawrlum hak haw tur a katih chu ka phawrh a, ka tuam ta a. A kawr huh la far fup fup chu, a tlang vel kan sawr sak thuak thuak a, ataksa vawt ngiak mai chu, vur nen danglamna a awmlo. Ka khawngaihna chuan ka hlauh ruk na zawng zawng a paih bo a. Hlauh lam reng reng ka hre chang tawh lo. Ti khan lo in ailum la, kan insiam anga. Kava thlah dawn che nia, kati a. Ka lèn chu ka tel a, maubur te chu arih loh deuh nan, a nâ ka thel thla thuak thuak a. Ka inpeih felhnu chuan, ti rawh le. I haw ang kati a, a rawn dingchhuak ve vat a, ka hmaah chuan akal khur bauh bauh a, a kawr atanga tuifar chu ala ngai reng mai a. Mahse, chu lam chu ka ngaihtuah zui lemlo. Ka khawngaihna avang chuan apa in a hawsan ngawt mai chu ka thinrim em mai a ni. A kal țha hleithei lo chu ka hmu thei nganglo a, ka ipte pui chu, ka hmalamah dahin ka paw ta a. Ka be bawrh bawrh reng a, min chhang em em hlei lo a.

Kawngpui kan chhuah hnu chuan, metal road lum laiah ka nghata. Ka bike chu kawngsir ata ka la chhuak a. Ka iptepui chu a hnungah ka phuar sawk sawk a, lo chuag rawh le tiin kan sawm a, athu ta tlat mai a. A thutna bul vel te chu a kawr atanga tui far chuan, alo ti huh hlup tawh a, mak kati țan ta deuh a, ka puakna lamah ka huh ve miah silo a, metal road lah a huh kuang mai bawk si, a kawr atanga tui ala far fup fup thei reng mai bawk nen. Ka zuk pawm a, ka thut tir hnu chuan, an khawlam pan chuan, kan tlan ta a ni.

Km4 vel kan tlan tawh ang, ka nau phurh chu atal atal ta mai a, ngatinge ti a, kan zawh chuan, khua avar tep tawh arawn ti ringawt a. Bike lah chu arit tulh tulh hian ka hria a. Number4 atlan par par theihna ah te chuan, two leh three angai ta tlat mai a, sa trawih rim, thâng uih ghur mai hi ka phur tel emaw tih turin ka hre tlat leh nghal, ka kawnga a kuahna kut leh a awm a, min rawn nghen na chu, vawt ngik ngiak tak a ni. An in awmna laivel kan zawt a, khaw tawntirh in rukna anih thu min hrilh a. Zawhna han zawh vak pawh ka insum hram hram a, heti khawpa vawt ti leh khawvawt in a hmeh si, ala dam mai ani lo. Ala kal thei a, ala țawng peih bawk hi mak kati in, tuarchhel kati takzet a ni.

Khua pawh kan hnaih viau tawh a, thil uih rim thang hur mai chu ana sa telh a, bike lah atlan chak thei tawh lo. Number 1 pawn min hnuk țawng țawng ani ber. Enga ti tehreng nge ni. Luia ka hlauhna ngai bawk khan min rawn tuam leh a, ka khur titih ta mai a. Khawchhung eng alang thei țan tawh tih ah chuan, ka thlamuang ve ta deuh a. Khuang ri tlut tlut ri ka hriat phei chuan, ka thlamuang huai huai mai a ni. Khawchhung kan lut țan dawn chiah tih ah chuan, ka chhuk duh ati ta tlat mai a, kan thleng dawn alawm hei, chhuk lo ang in In thleng ka thlah ang che,Tiin, Ka ding duhlo lui dawn ngial a. Mahse, tih tak te a, angen tak tlat avang leh a chet tak sek sek avang chuan, tlan chak theih chuang bawk siloh, ti rilru chungin ka ding ta a. Tinge vala, thlen dawn aruaiah, din itih tlat kati a. Ka haw thei tawh hleinem. Ka țhianpa hruai tur leh kha hmuna ațanga chhuah kha ka duh tawh vang ania.., kapu tun atang chuan tuman min hmu leh tawh ngailo ang, tih pah chuan a chhuk a. Ka hrethiam lo kher mai, enge isawi awmzia ti a, ka zawhna chu chhang lo in, saw ka țhianpa pawh alo kal e ati mai a. Ka head light eng ah chuan, mipa naupang, amah ang rual vel lo kal phei hnak hnak chu kava hmu a. Ka bike eng chu ka off a, ama lam kan hawi phei chuan, ka hmuh tirh ang reng reng kha alo ni tawh lo. Mipa naupang var pap hi alo ni reng mai, zanthim hnuaiah pawh var pap thei khawp chu mak tak a ni. A țhianpa arawn thlen chuan, kapu kan inah chuan va kal la, ka chhungte kha minlo mangțha sak dawn nia. Ka pa kha ka dem lo ani tih minlo hrilh sak la. A thiam loh nilo in, athu ka awihloh vang zawk ani si a. Hrehawm lo ti tawh reng reng suh se ati a. Hmun hrehawm tak ațanga min hruai chhuah avangin ka lawm e. Tuman min hruai haw duh ngai silo a. Vawt ti em em in kha lai velah khan kalo țap reng țhin asin ati a. Ka hrethiam uaih uaih in ka hria, ka hlau thar leh hnuhnawh a, ka hlauhna chu ka thup thei lo. Ka hlau tih an hria nge ni, min nuih sak a. Mit khap kar lek ah an bo ta mai a. Ka khur nasa lutuk chuan, chabi pawh ka herh fuh hleithei lawk lo leh nghal. Chak mangkhengin, ramhuai speed diktak in, thla phurh tawh loh hnu ah khawchhung lampan chuan, kan leu phei ta anih chu. Eng ang fakaua chakin nge ka tlan ka hre heklo. An in a sawi kawtah chuan, patling pakhat alo awm a. Kava din rual chuan, bike chu huanpal nghengin ka dintir rawk rawk a. Kava kuah ta chawt a. A makti hmel mengphar ai chuan, ka hlau leh makti hmel chu arapthlak zawk ngei ang. Ka khur nasa lutuk chu min kuah lut a. Tap chhakah mei a chhem lum a, puanlum min sin tir bawk a, ka thlamuang huai huai mai. Tiang khawpa hlau si, rampalaileng a naupang huh ka han phurh ngam ngawt dan kha ka hrethiam theilo reng reng.

Kan harhfim deuh hnu chuan, chupa chuan, ka hmingte min zawt in, ka thiltawn chu enge min han hrilh teh ati a. A thingpui min pek chu, kut khur dar dar chungin kan dùt khalh a.

Khawvar arkhuang chiah chiah leh kawl eng te chu ka hre fiah thei ta. A chhungte pawh an rawn tho phak phak a. Tap lumah chuan, ka thil tawn zawng zawng chu ka sawi ta a ni. An țap faih faih ri te chuan, minti lungchhe lek lek mai. A nu phei chu a insum thei lo zual a. Awrawl chhuah meuhin ațap ta hawm hawm a. Ava hrehawm duh tehreng em.

A pa chuan ti hian asawi ta a. Febuary thla lai hawl vel khan, i kalna luiah sawn lenkhang ka zar a. A en tur a ka kal tur chu ka fapa khan kalve angen tlat mai a. Nidangah pawh lenden naah te nghabur kengah ka hruai fo tawh țhin tho a, a chakve em avangin, school chawlh ni te ani bawk a tiin, ka hruaive ta a. Kurung lì kan hel naah sawn, a ipte ah chu hmalamah arawn tawlh uai thut mai a, chu chuan, a uaithla ta a ni. Tui thiamlo ve ve kan ni bawk si. Lungbang mam leh thui takin a hual chhuak vek si a. I hria anga, mau leh thingbung tak ngial pawh han inpek tur a awm loh bakah, awm pawh nise in pek ngaihna awm hek lo. A tawpah ka mangang lutuk chu ka zuangthla ve ringawt a. Mahse, kei lah tui hleuh tak ngial pawh thiam lo kalo ni bawk si. Ka talbuai ve nghal der mai a. Ka fapa chu chhan duh viau mah ila, alam panin pen khat lek pawh ka hleuh thei silo. Engtin-tin emaw, tui luan dan zul zui khan, ka inhai chhuak thei hram a. Ka harh chhuah leh chuan, ka fapa chu hmuh tur alo awm tawh lo a ni.

Aw,,,. Bawiha ipa hi kava nep tak em... Theih nise.., i thih ai ka thi ngam asin. Ngah nge maw, kalo hruaive kher kher che aw... Kapa ti khan min au tak țawk țawk a.. Ka chhan thei silo che a e.. Min ngaidam hram ang che aw.., tiin, ațap zui ta hlawp hlawp mai a.

Pa tana anat dan tur chu, fa la neilo tan pawh ka hrethiam uaih uaih in ka hria. A lungchhe zual an reh hnu chuan.

Ti khan lung chhe em em in ka hawsan ta ringawt a. Ka tan han chhar ngaihna a awm silo. In thiamlo leh hrehawm ti a, rilru na ngawih ngawih chung khan, hreh chung chungin ka hawsan ta a ni. In ka thlen lai leh ka haw dan engmah hriat ka nei heklo. Khawtlang kan pun a. Tlangval tui thiam ten min chharsak ta a ni. A ruang thlak zan khan, saw lai lui chhuah kawngpui ah sawn, sumo alo phar ani awm e. Mahse driver khan a hlau a, a ding ngamlo tih thu an sawi ka hria a. Driver in a hmelhmang asawi nen pawh bawiha hmel chu a intu vel viau a ni. Driver kha tianglai khaw hnai leh ramkal țhang te chu nise, nang ang hian naupang ramkal ah ngaiin a phur ve mai in ka ring a. Mahse, ka dem lemlo. Lo phur ta se chu an sawi nasat ang em em hi chu, i sawi danah a thleng dawn lo alo nih hi ati a. Khaw daia a țhianpa a rawn hruai itih chu, nimin tlai khan, a boral a. Tukin khawvar dawn hnaih a, kawt a kalo awm na chhan pawh kha, ka han lengve a, ka haw chiah anih kha ati ta zel a.

Chaw eive nghal la, chawei kham ah i haw dawn nia, ka fapa neih chhun ka chân a. Nangin thlamuang taka a chawlh theih nan i rawn hruai haw a. Ka lungdam ta huai mai. Ka fapa ah riak ka chan che a. Tun ațang chuan, i hmel hian min muan in, min ti hlim em em tawh dawn a ni. He inah hi chuan, inthlahrung ngai reng reng suh ang che. Ati charh charh

Ka sangha bur khat chu kava la a. Chawhmeh atan ka siamtir a. Kan inkawm zui ta zel a.

An khaw chhungah chuan, a inlar ngailo a. Kurung lui leh a bul mai kawngpui velah chuan, mi in anlo hmu fo ani awm e. Apa sawi zel dan chuan, mi hian kan hriata sawi chu hreh viau mahse, keini ang khawte ah zawng, atu mai pawhin sawi ta chu, hriat ve loh theih ni heklo le. A thla an hmuh tak fo ah chuan. Thenkhat phei chuan min dem in, ka tih hlum ni zawk ang hial ten an ngai lek lek ta mai a. Kan tan chuan, a hrehawm takzet a ni. Mawilo nilo se, nangzawng atawngtu ini bawk a. Sawi ta mai ila,

Sumo driver zan tlan ho leh luikal hian an hmuh thu ansawi ngun ber a. Kan kawmchhak tlangval leh vengtawp lama, in tawp ber dawttu ami te saw, hman zan khan, kurung luiah tho sawn lendeng in ankal a. Kurung an thlen chhoh hma ațang sawn a thawm an hre tawh a. Pahnih an nih avangin, an kal chho lui ta zel a. Kurung li an hel lai sawn, an hmingin a ko ani awm e. Inti huai lui in, ankal chho zel a, kan beng bulah hian, min hruai haw rawh arawn ti thin ani anti ve ve a ni.

Ngaihsak lo a, an chhoh zel avangin, an meichher a chhem hlum sak ta a. Kal luih ngaihna a awm tak loh mai bakah, huaisenna an nei tawh lo. Hlauhna in aman a, an meichher an chhit kai leh hma te chuan, an bul velah chuan, avel kual vel thuak thuak niin an sawi. Hlau thlabar lutuk leh hman hmawh pheleng in, an kir thla leh ta a. A pakhat zawk sawi dan chuan. Kurung kan han thleng thla leh chu, ka hlau tulh tulh mai a, a upa zawk ka nih avangin, hnung dawltu zawk ka nih angai bawk si, kurung kan hel chu, hlauhna nen hmanhmawh nen, mawng aza duh ngei mai. Ka hma a kal, ka thianpa chu kan hmanhmawh bawk a, a chesual ta. Lungbang mampur maiah chuan, arah a tleu a, atawlh thla ta mai a, inham tan tum a, aphar buai lai chuan a dingta chawt mai a, makti taka meicher a, ka zuk èn chu, mi räp lutuk tlat. Kan hlauh leh kan tlanchhiatsan tum ber, kan naua chuan, ka thianpa tla tlang tur chu a ke ah alo dawm a, khampang ah chuan, alo bawk phek ve thlur mai. A ruang zawn naah khan ka telve a, ka hmuchiang si, khami ni a, a hmelput hmang chiah chiah mai a, ka zuk hmu kha, ka thidang lo chauh a ni. Ka thianpa chuan makti zetin mi rawn en chho hau mai a, a dawmtu chu ala hmu lo mai mai zawk a ni. 

Hawi thla miah suh kan ti ringawt a, mahse han inpuih zui ngaihna a awmloh bakah, rawn lawn chho leh dawn pawh nise, vawn tur leh rahtur dang awm nghallo. Khur zawih zawih chung chuan, zuangthla mai rawh kati ta ringawt a. ani lah chuan, ala san em hii...ka ngam teuhlo. Enge ka rah hi ni reg reng a nem vawt ang thlur a, a che thei leh nghal tihpah chuan thei leh theilo in a zuk bih a, ensuh ka tih rual chuan azuk hmu ta. A hlau lutuk chu, thlabar zeta țe ruai ruai chungin, a zuangthla ta a. Kan naua pawn a thlirthla ve vung vung mai lehnghal a. Chutah ka lam rawn hawi chho in, kalo pui ang che tihpah chuan, bang mam zetah chuan, arawn vak chho ta zut zut mai roh a. Ka hlau thlabar mangang lutuk chu, ka zuangthla ve ta a. Khatiang reng reng a, tui ka hleuh chak kha kala hre ngailo. Tuiah khan ka tlan thei ni hialin ka hria, kan meichher thi tawh bawk si, thimtham hnuaiah chuan, kan thiandun in kan intlansiak thla hi ani ber. Kawngpui kan chhuah chuan, kan ipe te pawh kan ak tawhlo tih kan hre chiah. Chawl khawmuang hauhlo in, kan tlan haw nghal nal nal a. A tuk chawei kham ah kan lèn leh ipte la tur chuan, phurlo zetin, hlau chung chung chuan kan inti huai lui a. Kan va kal leh a, kurung lí thlen dawn a, lungpui lian vaklo chungah khan, kan ipte leh sangha bur te chu alo awm a, kan meichher pawh alo intung țha thlap a ni. Kan lèn pawh intel fel diam in, ipte chhungah alo awm bawk a. Han lak pawh a inthlahrun awm thei lek lek zawk ani ati. Ati ta a.

Chaweite an peìh tak ah chuan, kan ei tlang ta a. Sumo a, phurtu driver te pawh in an hmuh dan leh sawi dan atam viau mai. Mahse han sawi tur tam hle mahse, a thihdan alung chhiat thlak tawh tehreng nen, a thla an hmuh zui tak zel ah chuan, ami den dan adang in, a hrehawm duh khawp mai. Ka sawi tawh lo mai ange ati ta a.

Chawte kan eikham hnu chuan, keipawh kawt kaiah min thlah a, ka haw ve ta a ni.

Zanlama ka thuttirna hmun ka thlen phei chuan, ka lungchhe lek lek mai, eng eng emaw ngaihtuah neuh neuh chungin ka tlanpel phei ta zel a, kawi ka liam dawn țep chuan, ka side glass ațang ka țhuttirna hmun ațanga a ban min rawn vai (bye) lauh lauh hi ka zuk hmu a, ka ding chawt a, kava hawilet chuan, ka hmu zui lem lo. Atawp nan min rawn thlah ni ah ka ngai ta a ni. Tichuan, chu naupang khawngaihthlak tak rauthla leh a chanchin chu ngaihtuah neuh neuh chungin ka inkhal haw ta par par a.