RENGDIL TO AIZAWL

                                                                          -T.C.Lalhlimawma M.A (Eco), B.Ed

 Rengdil to Aizawl emaw Aizawl to Rengdil zin kawnga ka lo dai tawh kan share mai mai ang che u. Heng zinkawng zawh tur hian, tun dinhmuna Sumo ticket a pawimawh tluk zeta pawimawh chu ‘thurual pui, zin ve duhte’ an ni. Tutenge zin ve duh a, khawi kawngah nge kan kal ang? Motor beisei tur a awm ang em? Heng zawng zawng hi rel fel a nih hnuah chauh kal chhuah theih a ni!

 (a) Rengdil - Sihthiang - Sarali - Mamit - Aizawl: Mi 10 vel dawn lai kan niin ka hria, zingah Rengdil atangin Sihthiangah ke in kan chhuk a. Sihthiang Tuikuk ho feh kawng zawhin Sarali lam kan pan a. Teirei lui kan a ngai a, mau pum sat chawpin kan inkar kai a. Pum kartu kha Pu Thankhuma(L), Laltlanchhuaha pa kha  ni maiin ka hria. Teirei kanin Sarali-ah kan lut chho a, chuta tangin Mamit kan pan a. Mamit-ah riakin a tukah Aizawl kan pan ta a ni.

(b) Rengdil - Silchar - Aizawl: He kawngah hian MST a service thin. Thal lai chuan a kal tluan theih viau a, a kawng a thui deuh tih mai a ni. Rengdil atanga kal chuan Silchar-ah emaw Vairengte-ah emaw kan riak thin. Ni hnih hun kan hmang a nih chu.

MST Bus a nih lem loh chuan Aizawl atanga Karimganj night bus ah chhukin, eng tin tin emaw Rengdil lam tin zawn ngar ngara kal kha a ni mai. Fur tuilen laiin vawikhat chu kan Aizawl kal tum Silchar lamah kan kal a, kawngpui chu tui lianin a lo chim pil vek mai a, lawngleng hire a ngai an ti a. Lawngleng hmangin kan kal ta a. Silchar thlen hma km 7 velah kawngpui kan pawh leh ta a ni. 

(d) Rengdil - Bairabi - Kolasib - Aizawl: Rengdil atanga Baibari thleng ke, Bairabi atanga Kolasib thleng ke bawk. Kolasib to Aizawl chu motor remchang apiangah chuan chhoh tawh mai tur a ni. Tum khat chu he kawngah hian Aizawl atangin Lalrinawma (Aw Rina) nen Rengdil lam panin kan chhuk a. Kolasib atangin ke ngatin Maubuang khua kan ban. 

  

(e) Aizawl - West Phaileng - Tuilut - Serhmun - Rengdil: He kawng pawh hi MST Bus service thinna bawk a ni. Fur lai chuan kawng chhiat vanin a tlan thei lo. Tum khat chu he kawngah hian private bus service awm chhun Saikapthianga bus an tih maiah fur laiin kan chuang thla a. Tuilut atanga Serhmun inkar velah sawn kan tang nasa ta mai a. Bus atangin kan chhuk a, kan nam a, kan chuang a, kan chhuk leh a, kan nam kan nam ta mai a. Kan chuan pui Pu Chunga (Pi Zoremi pasal) thusawi ka la hriat reng chu “kan chuanna bus chu passengers tha in a lawm a kal le,” a tih chu a ni. 

(f) Aizawl - Zawlnuam - Rengdil: Hei hi chu helicopter ngat a ni ve thung. Zemabawk helipad atangin Zawlnuam-ah ka thlawk thla a. Zawlnuam-ah ka’n tum thla chhak a, Zawlnuam to Rengdil kha chu tlachawp programme a ni tawh a. Pu Thansanga fapa Dawnga ka hmu fuh hlauh mai a, kan inthurual ta a. Rengdil kal tur motor, a bik takin tractor kan han ngaih ven ngial a. kan hmu zo lo. Thuampuiah thingpui kan in a, ke ngatin Rengdil lam panin, a let zawngin ka in ak chho ta hnak hnak mai a ni. A hun leh ni ka hre tawh lo helipcopter service hmasak zawk lai kha a ni.